Тринаесет лица се лишени од слобода во засилена акција на Министерството за внатрешни работи насочена кон сузбивање на недозволената трговија со дрога, која во текот на викендот беше спроведена на територијата на целата држава.
Како што соопшти МВР, акцијата е реализирана во рамки на активностите на Работниот тим (Task Force) за борба против недозволената трговија со дрога.
Во текот на акцијата биле извршени 13 претреси, 197 контроли на возила и 295 прегледи на лица. При тоа, од слобода биле лишени 13 лица.
Полициските службеници пронашле и одзеле 79 пакувања со наркотични материи, како и пиштол „Глок 17“ со муниција.
Од Министерството за внатрешни работи посочуваат дека активностите за сузбивање на недозволената трговија со дрога ќе продолжат со засилен интензитет, со цел откривање на сторителите, разбивање на криминалните мрежи и зајакнување на безбедноста на граѓаните.
