Засилени контроли на Охридското Езеро: Нерегулираните пловила ќе бидат задржани

Царинската управа најави дека во наредниот период ќе спроведува засилени теренски контроли на пловните објекти што се користат на Охридското Езеро, со цел проверка на нивниот царински статус и почитувањето на законските обврски.

— реклама —

Контролите ќе ги спроведува Одделението за оперативни работи при Секторот за контрола и истраги, а од Царинската управа ги повикаа сите сопственици и корисници на пловила кај кои не е спроведена соодветна царинска постапка, навреме да го регулираат нивниот статус.

— реклама —

Оттаму предупредуваат дека сите пловни објекти кај кои ќе биде утврден нерегулиран царински статус ќе бидат предмет на законска постапка. Во такви случаи ќе се преземаат мерки за утврдување на царинските обврски, како и привремено задржување на пловилата до нивно целосно исполнување.

Предмет на контрола ќе бидат и пловните објекти во сопственост на нерезиденти кои престојуваат во земјава со дозвола за привремен увоз. По истекот на дозволениот рок тие мора да го напуштат царинското подрачје или за нив да биде спроведена соодветна царинска постапка.

— реклама —

Дополнително ќе се проверува и дали пловилата ги управуваат лица кои согласно закон имаат право да го сторат тоа.

Од Царинската управа истакнуваат дека контролите се дел од редовните активности за обезбедување доследна примена на царинските прописи и ги повикуваат домашните и странските државјани навремено да го усогласат статусот на своите пловни објекти со важечката законска регулатива.