Засилени контроли на сладоледот и мразот: Уништени 202 килограми небезбедни производи, изречени 45 казни

Сладоледот и мразот беа под засилен инспекциски надзор во текот на летото, при што Агенцијата за храна и ветеринарство (АХВ) во периодот од почетокот на јули до крајот на август извршила 560 контроли.

Надзорот бил спроведен во објекти каде што се произведуваат сладолед и мраз, како и во угостителски објекти кои самостојно произведуваат и ставаат во промет вакви производи за сопствени потреби.

— реклама —

При контролите биле издадени 140 решенија поради утврдени неусогласености, а биле изречени и 45 парични казни во вкупна вредност од 19.430 евра во денарска противвредност.

— реклама —

Како небезбедни биле уништени 202 литри, односно килограми сладолед и мраз. Инспекторите утврдиле и дека 17 оператори не биле регистрирани како оператори со храна во АХВ.

Кај 64 оператори не биле направени потребните анализи на сладоледот или мразот, додека кај 20 биле констатирани неправилности во означувањето на производите. Кај тројца оператори било утврдено дека мразот бил набавуван од нерегистриран добавувач.

— реклама —

Контролите покажале и дека кај 10 оператори имало вработени кои немале извршено задолжителни здравствени прегледи.

Незадоволителни хигиенски и технички услови биле утврдени во пет објекти. Дополнително, 19 оператори немале воспоставено процедури за Добра производствена и Добра хигиенска пракса, како и процедури за чистење на ледоматите.

Кај четири оператори немало записи за следливост на производите, додека кај еден биле утврдени пропусти во спроведувањето на задолжителните мерки за дезинфекција, дезинсекција и дератизација.