Управата за финансиска полиција поднесе кривична пријава до Основното јавно обвинителство Струга против едно физичко лице и едно правно лице поради сомнение за сторено кривично дело „даночно затајување“.
Според соопштението, првопријавениот С.З., во својство на сопственик и управител на пријавеното правно лице, е осомничен дека со намера да стекне противправна имотна корист за себе и за компанијата, неосновано присвоил трговска стока евидентирана како залиха, чија вредност изнесувала 26.085.138 денари.
Од Финансиската полиција наведуваат дека при тоа не биле пресметани, пријавени и платени обврските за данок на додадена вредност по стапки од 18 и 5 проценти, како и данок на личен доход, со што биле избегнати даночни обврски во повеќемилионски износи.
Во пријавата се наведува и дека осомничениот не ги евидентирал како приход застарените и ненамирени обврски во износ од 8.120.980 денари, иако тие, согласно законските одредби, требало да бидат признаени како приход.
Дополнително, според Финансиската полиција, за 2025 година воопшто не бил поднесен даночен биланс, ниту бил пресметан, пријавен и платен данок на добивка во износ од 812.098 денари.
Со наведените дејствија, според Управата за финансиска полиција, пријавените не ги пресметале, не ги пријавиле и не ги уплатиле законски утврдените даночни обврски, со што Буџетот на Македонија бил оштетен за вкупно 8.070.791 денари.
