Во Гостивар е пријавен необичен инцидент, откако заталкан куршум оштетил паркиран автомобил, информираат од Министерството за внатрешни работи.
Според полицијата, случајот бил пријавен на 30 јули во ОВР Гостивар. Во периодот меѓу 22:00 часот на 29 јули и 09:40 часот на 30 јули, заталкано зрно од огнено оружје удрило во покривот на патнички автомобил „мерцедес“ со германски регистарски таблички, паркиран на улицата „Гоце Делчев“. Возилото е сопственост на С.А. од Гостивар.
Во инцидентот нема повредени лица. Проектилот е подигнат од полициски службеници за понатамошна постапка, а увид на местото извршила екипа на полицијата.
Од МВР информираат дека се преземаат мерки за целосно расчистување на случајот.
