ВМРО-ДПМНЕ соопшти дека Владата во изминатите две години реализирала најголеми инвестиции во образованието и науката, наведувајќи дека буџетот за оваа област во 2026 година достигнал рекордни 40 милијарди денари.
Од партијата велат дека тоа претставува значително зголемување во однос на 2024 година, кога, според нив, буџетот за образование изнесувал 32 милијарди денари.
„Веднаш откако СДС замина во опозиција, а ВМРО-ДПМНЕ ја презеде одговорноста да управува со институциите, се обезбедија дополнителни 900 милиони денари за редовна исплата на платите во училиштата и 1,4 милијарди денари за повисоки плати на универзитетските професори“, наведуваат од ВМРО-ДПМНЕ.
Според партијата, особено внимание било посветено на високото образование, при што буџетот за оваа област во 2026 година достигнал 8 милијарди денари, што, како што тврдат, е речиси трипати повеќе во споредба со 2022 година, кога изнесувал помалку од 3 милијарди денари.
Во соопштението се наведува и дека буџетот за наука е зголемен од 380 милиони на 773 милиони денари, а само во 2025 година биле обезбедени околу 370 милиони денари за педесетина научноистражувачки проекти од национален интерес.
Од ВМРО-ДПМНЕ посочуваат дека повторно се инвестира и во високото образование преку инфраструктурни проекти, меѓу кои ги издвојуваат реконструкцијата на два државни студентски дома, продолжувањето на проектот за новите објекти на Факултетот за информатички науки и компјутерско инженерство (ФИНКИ), како и започнатата постапка за изградба на нов објект за Факултетот за физичка култура, спорт и здравје.
Партијата наведува и дека, покрај финансиските вложувања, биле преземени мерки за подобрување на квалитетот на високото образование.
„Во интерес на квалитетот на високото образование, се затворија 18 приватни научни институти и високообразовни установи кои не работеле согласно закон, а се подготвува и нова законска рамка за дополнително унапредување на системот“, соопшти ВМРО-ДПМНЕ.
Од партијата оценуваат дека Владата гради систем што инвестира во квалитетно образование, наука и подобри услови за идните генерации.
