Зелен хуман град предупредува: Со измените се ослабува заштитата од загадувачката индустрија

Предлог-измените на Законот за животна средина, кои денеска се на дневен ред во Собранието, ќе имаат „девастирачки последици врз животната средина, здравјето на луѓето и целиот жив свет во земјава“, предупредува „Зелен хуман град“.

Од иницијативата посочуваат дека предложените измени веќе добиле по осум гласа „за“ во Комисијата за европски прашања и во Законодавно-правната комисија. Според нив, пратениците во комисиите го квалификувале предлог-законот како „прифатлив од аспект на неговата усогласеност со правото на ЕУ“ и препорачале да продолжи во натамошна собраниска процедура.

Од „Зелен хуман град“ велат дека ниту еден пратеник во овие комисии не гласал против или воздржано.

— реклама —

Според иницијативата, под превезот на „поедноставување“ се предлага бришење на клучни механизми за идентификација, управување и санација на контаминирани подрачја, со што, како што тврдат, се ослабува заштитата од индустриското и рударското токсично наследство.

Особено го издвојуваат бришењето на членовите 28-а, 28-б, 28-в и 28-г од актуелниот Закон за животна средина, кои се однесуваат на контаминираните подрачја.

„Зелен хуман град“ предупредува дека со бришењето на членот 28-б се укинува планот за управување со контаминирани подрачја, кој, според нив, со години спречувал загадено земјиште да може да се продава или да се дава под концесија без соодветни информации.

Како дополнителен проблем го посочуваат и бришењето на членот 28-в, со што, според нив, се укинува механизмот за координација меѓу институциите, општините и научните установи при постапувањето со државни контаминирани подрачја.

— реклама —

Од „Зелен хуман град“ реагираат и на предложената промена на членот 20, со која, како што тврдат, се брише досегашната забрана за реконструкција на тешка и загадувачка индустрија на растојание помало од пет километри од населено место или заштитено природно подрачје.

„Наместо да се оди кон целосно оддалечување на загадувачката индустрија од населени подрачја, со измените се прави катастрофален регресивен чекор“, велат од иницијативата.

Критики упатуваат и на измените поврзани со јавните расправи. Според „Зелен хуман град“, се брише обврската во записникот од јавните расправи да се вклучат заклучоците и да се приложуваат стенографски белешки, како и аудио или видеозапис од расправата, кои задолжително треба да бидат јавно објавени на интернет.

— реклама —

Од иницијативата предупредуваат и дека со предложените измени може да се намали електронската достапност на документацијата поврзана со загадувачки капацитети и проекти.

Дополнително, реагираат на измената со која, наместо досегашното прибавување мислења од повеќе надлежни институции за индустриската безбедност, се предвидува четиричлена комисија определена од министерот.

„Зелен хуман град“ ја проблематизира и предложената одредба според која, доколку надлежните органи не достават мислење во предвидениот рок, ќе се смета дека немаат забелешки.

Од иницијативата сметаат дека на овој начин административното доцнење или недостигот од кадар може да се протолкуваат како отсуство на проблем, иако институцијата можеби располага со важни информации за здравствената или безбедносната состојба.

— реклама —

„Зелен хуман град“ во објавата го критикува и користењето на европското знаменце за предложените измени, оценувајќи дека станува збор за „свесна злоупотреба на европското знаменце“.

Од иницијативата посочуваат и дека во образложението на предлог-измените стои оти тие немаат фискални импликации врз државниот буџет, но додаваат дека, според нив, вистинската цена може да биде здравјето на граѓаните и последиците врз животната средина.

„Зелен хуман град“ повикува на преиспитување на предложените измени и предупредува дека дополнителното ослабување на законската заштита од загадувачката индустрија може да има сериозни последици врз луѓето, животинскиот и растителниот свет.