„Зелен хуман град“ бара преиспитување на проектот за подземната сообраќајница кај „Антон Попов“

Од „Зелен хуман град“ алармираат за, како што наведуваат, загрозена безбедност на жителите на станбениот комплекс на улицата „Антон Попов“ бр. 1 во Скопје, поради проектното решение за втората фаза од булеварот „Македонија“ и влезот во планираната подземна сообраќајница.

Според нивното соопштение, проектот засега повеќе од 200 станови, околу 800 жители и дваесетина деловни субјекти. Најголема загриженост предизвикува планираниот длабок ископ непосредно до зградите, поради што жителите бараат пристап до целосната техничка документација и независна стручна проценка на влијанието врз темелите и стабилноста на објектите.

— реклама —

Од „Зелен хуман град“ посочуваат дека, и покрај повеќемесечната комуникација со Град Скопје, станарите сè уште немаат целосен увид во документацијата за геомеханичките истражувања, заштитата на градежната јама, фазите на ископ и следењето на состојбата на околните објекти.

— реклама —

Дополнителна загриженост предизвикува и сопственичкиот спор за дел од земјиштето опфатено со проектот. Со првостепена пресуда на Основниот граѓански суд Скопје била утврдена ништовност на договорот за физичка делба на недвижниот имот од 3 април 2013 година, но предметот сè уште е во жалбена постапка пред Апелациониот суд Скопје.

— реклама —

Жителите бараат и јасно сообраќајно решение за пристап до домовите и паркиралиштата, како и непречено движење на противпожарните возила, брзата помош и другите интервентни служби. Тие предупредуваат дека проектот предвидува одземање значителен дел од просторот што досега го користеле за паркирање, без да им биде понудено конкретно заменско решение.

Станарите на 23 јули 2026 година доставиле официјален приговор и барање за запирање и преиспитување на проектот, заведено под број 08-8873/1. Одговорот од Секторот за сообраќај од 7 септември, според нив, не ги разрешил сите отворени прашања.

— реклама —

Од „Зелен хуман град“ бараат Советот на Град Скопје итно да го разгледа случајот, да побара целосни информации од надлежните служби и да организира средба со претставници на жителите и одговорните за проектот.

Меѓу главните барања се доставување на проектната документација и независна стручна проверка, разјаснување на сопственичките односи, обезбедување траен пристап до комплексот и конкретно решение за надоместување на изгубените паркинг-места.