Украинскиот претседател Володимир Зеленски се прости од американскиот сенатор Линдзи Греам, кој почина на 71-годишна возраст по кратко и ненадејно боледување, оценувајќи дека „Америка и светот загубија решителен лидер“.
Греам, републикански сенатор од Јужна Каролина и еден од најблиските сојузници на американскиот претседател Доналд Трамп, починал откако итните служби интервенирале во неговиот дом во Вашингтон по пријава за срцев застој.
Само еден ден пред смртта, Греам престојуваше во Киев, каде се сретна со украинскиот претседател.
„Длабоко ме растажи веста за смртта на Линдзи. Тој беше вистински бранител на слободата и вредностите што го прават нашиот свет побезбеден. Работеше на важни иницијативи кои можеа да го приближат мирот, вклучително и построги санкции против Русија. Америка и светот загубија решителен лидер“, напиша Зеленски.
Од Греам се прости и Доналд Трамп, кој на социјалната мрежа Truth Social го нарече „еден од најголемите луѓе и сенатори што некогаш ги познавал“.
„Секогаш работеше напорно и беше вистински американски патриот. Линдзи многу ќе ни недостига“, напиша Трамп.
Сочувство изразија и поранешниот британски премиер Борис Џонсон и израелскиот премиер Бенјамин Нетанјаху. Џонсон го опиша како „непоколеблив бранител на западните вредности“, додека Нетанјаху порача дека Израел „загуби еден од своите најголеми пријатели“.
Линдзи Греам беше избран во американскиот Сенат во 2002 година и важеше за еден од највлијателните републикански сенатори во областа на одбраната и надворешната политика. Иако во почетокот беше критичен кон Доналд Трамп, со текот на времето стана еден од неговите најблиски политички сојузници.
