Украинскиот претседател Володимир Зеленски повторно упати апел до американскиот претседател Доналд Трамп и Соединетите Американски Држави за испорака на системи „Патриот“, по еден од најжестоките руски воздушни напади од почетокот на војната.
Во текот на ноќта, Русија изврши масовен напад врз повеќе украински градови, при што загинаа најмалку 14 лица, десетици се повредени, а спасувачките екипи сè уште трагаат по луѓе затрупани под урнатините.
Според украинските воздухопловни сили, кон Украина биле лансирани 73 ракети од различен тип, меѓу кои и осум хиперсонични ракети „Циркон“, како и 656 беспилотни летала. Главни цели на нападите биле Киев, Днипро, Запорожје, Полтава и Харков.
Во украинската престолнина силни експлозии одекнувале во текот на ноќта, додека жителите барале засолниште во метро-станиците и подрумите. Според локалните власти, во Киев загинале пет лица, а најмалку 63 се повредени, меѓу кои и три деца.
„Ова беше голем напад и целосно транспарентна порака од Русија. Ако Украина не биде заштитена од балистички и други ракетни напади, тие ќе продолжат“, напиша Зеленски на социјалните мрежи.
Тој нагласи дека на Европа ѝ се потребни сопствени антибалистички капацитети, но и дека американската поддршка останува клучна.
„Дефинитивно ни е потребна помошта од САД во испораката на системи како „Патриот“. Сметаме на поддршката од нашите партнери и на ефикасен одговор на денешниот напад“, порача украинскиот претседател.
Зеленски веќе подолг период предупредува дека украинските резерви на ракети-пресретнувачи за системите „Патриот“ се намалуваат, а токму тие системи се сметаат за најефикасна заштита од балистички проектили.
Во Днипро загинале најмалку девет лица, а 36 се повредени. Меѓу жртвите има и спасувач кој настрадал за време на втор напад додека интервенирал на местото на првиот удар. Дополнително, шест лица се водат како исчезнати по уривањето на станбена зграда.
Значителна штета е предизвикана и во Харков, каде што се оштетени повеќе станбени објекти, гаражи и возила, а најмалку 14 лица се повредени.
Поради нападите, без електрична енергија останале околу 140.000 жители на Киев. Дел од снабдувањето подоцна било обновено, но штетите на енергетската инфраструктура остануваат значителни.
Русија претходно најави дека ќе спроведува систематски напади врз цели поврзани со украинската војска и центрите за одлучување, додека украинските власти предупредуваат дека воздушните напади може дополнително да се интензивираат во наредниот период.
