Украинскиот претседател Володимир Зеленски ги отфрли критиките на американскиот претседател Доналд Трамп за украинските напади врз руската нафтена индустрија, во пресрет на најавената средба на двајцата лидери во Њујорк.
„Украинскиот енергетски сектор, критичната инфраструктура и нашиот извоз на храна мора да престанат да бидат цели на Русија, што од наша страна ќе доведе до соодветни чекори за деескалација“, напиша Зеленски на платформата „Икс“, одговарајќи на објава на Трамп на неговата платформа „Truth Social“.
Трамп претходно напиша дека Русија „за жал ја изгубила контролата врз својата индустрија за производство на дизел-гориво“. Тој посочи дека голем дел од руските рафинерии биле уништени во експлозии и дека не се во функција.
„Оваа смешна и бескрајна војна со Украина мора да заврши“, порача Трамп.
Американскиот претседател и претходно го повика Зеленски да ги прекине нападите врз руските рафинерии, обвинувајќи го за глобалниот недостиг на дизел-гориво.
Од друга страна, Зеленски порача дека украинската страна очекува руските напади врз украинската енергетска инфраструктура и другите критични објекти да престанат, по што би следеле соодветни чекори од Киев за намалување на тензиите.
Средбата меѓу Трамп и Зеленски, според најавите, треба да се одржи во вторник, на маргините на Генералното собрание на Обединетите нации во Њујорк.
