Володимир Зеленски наводно им наредил на украинските функционери да се подготват за уште две до три години војна, објави британскиот магазин „Економист“, повикувајќи се на владини извори.
Според магазинот, Зеленски побарал подготовки за продолжување на конфликтот, при што било оценето дека Украина и натаму може да ја продолжи борбата, иако, како што се наведува, земјата е погодена од милитаризација и воена корупција.
„Колку и да изгледаат лошо работите, ќе го надминеме ова“, изјавил висок извор од украинските разузнавачки служби за „Економист“.
Сепак, советникот на Зеленски за комуникации, Дмитро Литвин, ги отфрли овие информации и ги нарече „рециклирана дезинформација“.
Тој посочи дека претседателот на Украина на состанок со парламентарната фракција нагласил дека фокусот треба да биде ставен на следните шест месеци, односно до ноември.
На 25 мај Зеленски одржал состанок со членовите на фракцијата „Слуга на народот“, на кој присуствувале и шефот на претседателскиот кабинет, Кирило Буданов, премиерката Јулија Свириденко и други високи функционери.
Според извори на „Украинска правда“, за првпат по многу години разговорот меѓу претседателот и пратениците личел на вистинска дискусија.
Еден од учесниците изјавил дека Зеленски рекол оти постои чувство дека Русија во рок од околу шест месеци би можела да биде доведена во состојба да биде подготвена за преговори.
„До тогаш сите мора да се обединат, да ги остават настрана несогласувањата и заеднички да работат најмалку шест месеци“, наводно порачал украинскиот претседател.
