Зеленски: Никој не верува дека Путин е подготвен да ја заврши војната преку дијалог

Украинскиот претседател Володимир Зеленски соопшти дека на самитот на Г7 добил позитивни сигнали за дополнително зајакнување на противвоздушната одбрана на Украина од сите лидери на најразвиените земји, вклучително и од американскиот претседател.

Во објава на социјалната мрежа Икс, Зеленски истакна дека за првпат САД позитивно ја прифатиле идејата за лиценцирано производство на ракети, додавајќи дека следуваат неопходни консултации со производителите, и изрази надеж дека процесот ќе заврши со позитивен исход.

— реклама —

Тој нагласи дека, според неговите согледувања, никој не гледа подготвеност кај рускиот претседател Владимир Путин да седне на преговарачка маса и да стави крај на војната преку дијалог.

— реклама —

„Постои чувство дека дури и луѓето околу него разбираат дека не може да ја окупира Украина и да победи во оваа војна“, порача Зеленски.

Украинскиот претседател повтори дека Киев сака конфликтот да заврши што е можно побрзо, но оцени дека за тоа се потребни дополнителни санкции кон Русија.

— реклама —

Осврнувајќи се на разговорите со американскиот претседател Доналд Трамп, Зеленски наведе дека добил уверување оти политиката на поддршка за Украина ќе продолжи.

— реклама —

„Ќе добиеме значително поголема поддршка. Целта е Путин да разбере дека поддршката нема да запре и дека е подобро да ја запре војната“, истакна тој.

Зеленски изрази уверување дека преговорите со руската страна ќе продолжат, иако засега не е познато во каков формат ќе се одвиваат. Според него, европските партнери се залагаат за заеднички пристап со Соединетите Американски Држави, а Украина смета на безбедносни гаранции по завршувањето на војната и на напредок кон членство во Европската Унија.