Украинскиот претседател Володимир Зеленски оцени дека војната со Русија влегла во нова фаза и дека нејзиниот исход сè повеќе ќе зависи од контролата врз воздушниот простор, а не од копнените операции. Во интервју за „Фајненшл тајмс“, дадено неколку часа по новиот руски напад врз Киев, тој изјави дека „битката на небото“ ќе биде клучна за конечниот исход на конфликтот.
Според Зеленски, украинските сили успеале да го запрат руското напредување на копно и значително да ја ограничат активноста на руската флота во западниот дел на Црното Море, поради што воздушниот простор станал главното бојно поле.
„Верувам дека победата ќе му припадне на оној што е попаметен. Кога ќе го запрете непријателот на копно и ќе му ја ограничите доминацијата на море, тогаш следната пресудна битка се води на небото“, изјави Зеленски.
Тој откри и детали од неодамнешен телефонски разговор со американскиот претседател Доналд Трамп, кој, како што рече, позитивно ја оценил украинската кампања со беспилотни летала со долг дострел. Зеленски смета дека Трамп денес поинаку гледа на војната отколку претходно.
Во меѓувреме, украинските сили, според Зеленски, продолжуваат со напади врз воени и енергетски цели длабоко на руска територија. Меѓу нив е и нападот врз рафинерија во Омск, на околу 2.500 километри од украинската граница, што се смета за еден од најдлабоките украински удари од почетокот на војната.
И покрај тоа, украинскиот претседател предупреди дека најголемата слабост на земјата останува недостигот од системи за одбрана од балистички ракети.
„Останува една голема непознаница – антибалистичката одбрана. Тоа е најслабата точка на Украина“, истакна тој.
Во последниот масовен руски напад врз Киев загинаа најмалку 15 лица, а 43 беа повредени. Украинските власти соопштија дека Русија лансирала стотици беспилотни летала и десетици балистички и крстосувачки ракети. Според Киев, украинската противвоздушна одбрана не успеала да пресретне ниту една од 29-те балистички ракети истрелани во нападот.
Зеленски повторно ја повика меѓународната заедница да испорача дополнителни системи „Патриот“ и ракети-пресретнувачи, но и да ѝ овозможи на Украина самостојно да произведува вакви системи.
„Европа треба да престане да биде неодлучна. Потребно е да ја сподели технологијата и индустриските капацитети, затоа што никогаш нема да има доволно системи ‘Патриот’ за сите“, порача украинскиот претседател.
Тој изрази уверување дека Украина може да извојува победа доколку западните партнери продолжат со финансиската и воената поддршка, а украинската армија ја задржи линијата на фронтот.
Зеленски додаде дека Киев ќе продолжи со нападите врз воени цели на Крим и во внатрешноста на Русија, оценувајќи дека долгорочниот психолошки и економски притисок врз Москва може да влијае врз одлуките на Кремљ.
„Кога кон Москва нема да летаат сто, туку илјада дронови, тогаш ќе сфатат“, изјави Зеленски.
