Зеленски со порака до Трамп: Русија не презема никакви чекори кон мирот

Украинскиот претседател Володимир Зеленски ја доведе во прашање подготвеноста на Русија да ги почитува договорите за енергетско примирје, откако, според неговите тврдења, руските сили 76 пати намерно го нападнале украинскиот енергетски сектор, откако американскиот претседател Доналд Трамп пред една недела објави дека е постигнато примирје.

— реклама —

„Само во текот на изминатата ноќ беа регистрирани напади врз трафостаници во областите Виница, Житомир, Хмелницки и Одеса. Десетици илјади семејства и понатаму се без електрична енергија. Енергетските работници и екипите за поправки работат речиси деноноќно за да го обноват снабдувањето“, објави Зеленски на својот профил на Икс.

Тој потврди дека руските сили во текот на ноќта погодиле и станбени објекти во повеќе украински области. Според досегашните податоци што ги објави, повредени биле 12 лица, меѓу кои и две деца, додека две лица го загубиле животот.

— реклама —

Зеленски посочи дека во изминатата недела Русија ја нападнала Украина со речиси 2.700 ударни беспилотни летала, 1.700 воздушни бомби и 66 ракети, од кои повеќето биле балистички. Како главни цели на нападите ги посочи енергетските објекти.

— реклама —

Тој оцени дека Москва се обидува целосно да го прекине снабдувањето со електрична енергија во Украина и порача дека САД треба да забележат оти Русија не возвраќа со соодветни чекори на ублажувањето на санкциите или на постигнатите договори.

Според Зеленски, руските власти секој сигнал за можност за остварување профит го толкуваат како потврда дека продолжувањето на војната им се исплати.

„Русија мора да се соочи со притисок за да има шанса за мир“, порача украинскиот претседател.