Зеленски утре првпат доаѓа во официјална посета на Србија

Украинскиот претседател Володимир Зеленски утре ќе престојува во прва официјална посета на Белград, каде што ќе се сретне со српскиот претседател Александар Вучиќ.

— реклама —

Од кабинетот на Вучиќ не соопштија детали за посетата, но српскиот претседател најави дека со Зеленски ќе разговара за европската интеграција на двете земји, билатералната економска соработка и енергетските прашања.

„Се соочуваме со исти проблеми на европскиот пат, па верувам дека ќе разговараме како меѓусебно да си помогнеме. Ќе стане збор и за економската и енергетската соработка, но и за други теми од заеднички интерес“, изјави Вучиќ.

— реклама —

Двајцата лидери досега се сретнаа повеќепати на меѓународни конференции, а последен пат во јули, во Киев, на Самитот Украина – Југоисточна Европа.

— реклама —

На тој самит беше усвоена заедничка декларација за продолжување на политичката, воената, финансиската и безбедносната поддршка за Украина и за зголемување на притисокот врз Русија поради инвазијата. Вучиќ беше единствениот лидер од регионот што не ја потпиша декларацијата.

Иако Србија ја осуди руската инвазија врз Украина, Белград и натаму одбива да им се приклучи на санкциите на Европската Унија против Москва, повикувајќи се на традиционално блиските односи со Русија.

— реклама —

За време на средбата во Киев, Вучиќ и Зеленски се договорија да ги интензивираат билатералните контакти и почесто да се среќаваат на највисоко ниво, со цел унапредување на соработката и меѓусебна поддршка на нивниот европски пат.