Земјотрес со јачина од 5 степени ја погоди Шпанија

Земјотрес со јачина од 5 степени рано утрово ја погоди областа Гранада во јужна Шпанија, при што засега нема информации за повредени, но е регистрирана материјална штета.

Епицентарот бил во близина на местото Алхендин, а земјотресот се случил на длабочина од само два километри, соопштија шпанските власти.

— реклама —

„Ноќ на вознемиреност во Гранада по земјотресот со јачина од 5 степени, кој предизвика одредена материјална штета, а потресот се почувствува и во неколку други провинции“, објави претседателот на владата на Андалузија, Хуанма Морено.

Тој ги повика граѓаните да останат смирени и внимателни во близина на оштетените покриви и фасади, кои би можеле дополнително да се урнат, како и да ги следат препораките на надлежните служби.

— реклама —

Службата за итни случаи 112 примила повеќе од 200 повици од граѓани по земјотресот.

— реклама —

Шпанскиот Национален географски институт првично ја проценил јачината на земјотресот на 4,8 степени, но подоцна проценката била коригирана на 5 степени.

На повеќе локации во Гранада биле регистрирани одрони, паѓање делови од фасади и покриви, како и друга материјална штета. Во местото Лас Габиас превентивно била евакуирана една зграда поради сомневање дека претрпела оштетувања.

Во Хујетор Вега дошло и до прекин на електричната енергија.

Градските власти на Гранада соопштија дека засега нема сериозна или широко распространета штета, но проверките на објектите и пријавените оштетувања продолжуваат.