Земјотрес со јачина од 4,5 степени според Рихтеровата скала ноќеска во 1:59 часот ја погоди Австрија, со епицентар во подрачјето на Земеринг.
Според австриската геолошка служба Geosphere Austria, епицентарот бил на длабочина од четири километри, а потресот бил почувствуван во источниот дел на Долна Австрија и Штаерска, како и во Виена. Надлежните служби примиле голем број пријави од граѓани.
Земјотресот предизвикал помала материјална штета, а на патот меѓу Шотвиен и Брајтенштајн дошло до одрони на карпи, поради што интервенирале пожарникари за расчистување на коловозот.
Потресот бил регистриран и од сеизмографите на словенечката Агенција за животна средина (ARSO). Според нивните податоци, бил почувствуван во северозападниот дел на Словенија, а интензитетот на словенечка територија не надминал трет степен според Европската макросеизмичка скала.
