Американскиот преговарач и зет на претседателот Доналд Трамп, Џаред Кушнер, вчера во Египет се сретнал со високиот претставник на Хамас, Калил ал-Хаја, во обид да се придвижат преговорите за прекин на конфликтот во Газа.
Средбата траела повеќе од два часа, а на разговорите присуствувале и претставници на Египет, Катар и Турција, кои посредуваат во преговорите. Кушнер денеска треба да се сретне и со израелскиот премиер Бенјамин Нетанјаху.
Во центарот на разговорите е американскиот план според кој Хамас постепено би го предал оружјето, додека израелските сили би започнале повлекување од Газа. Токму редоследот на овие чекори досега претставува една од главните пречки во преговорите.
Хамас по средбата ги повика посредниците и американскиот Одбор за мир, кој го надгледува спроведувањето на примирјето, да извршат притисок врз Израел за прифаќање на планот.
Од Хамас порачаа дека се подготвени да го спроведат договорот и дека го очекуваат почетокот на 14-дневниот период за преговори, во кој би требало да се утврди распоредот за негово спроведување. Овој период може да започне само доколку сите страни го прифатат планот.
Хамас бара Израел пред почетокот на спроведувањето да ги прекине нападите и да ги повлече силите до таканаречената „жолта линија“. Таа граница досега не е прецизно дефинирана, а израелските сили во моментов контролираат околу 60 отсто од Појасот Газа.
Нетанјаху, пак, минатата недела го отфрли американскиот предлог и порача дека израелските сили нема да се повлечат од ниту една позиција сè додека Хамас целосно не биде разоружан.
Според планот, Хамас би го предал оружјето на палестински технократски одбор кој би требало да ја преземе секојдневната управа со Газа. Одборот сè уште не влегол во Појасот.
Хамас предавањето на најтешкото оружје го поврзува со воспоставување палестинска држава, на што актуелната израелска влада се противи. Поради несогласувањата околу разоружувањето и израелското повлекување, блокирани се и други делови од планот, меѓу кои обновата на Газа и распоредувањето меѓународни сили.
Кушнер денеска кај Нетанјаху треба да пристигне заедно со поранешниот британски премиер Тони Блер и директорот на Одборот за мир, Николај Младенов.
Во меѓувреме, Саудиска Арабија, Обединетите Арапски Емирати, Јордан и други земји го осудија отфрлањето на планот од страна на Израел и побараа од САД и Одборот за мир да преземат конкретни чекори за да спречат блокирање на неговото спроведување.
