ВМРО-ДПМНЕ преку соопштение соопшти дека Оперативниот план за вработување за 2026 година предвидува засилена поддршка за младите и мерки насочени кон отворање нови работни места и намалување на невработеноста.
Од партијата во соопштението посочуваат дека преку мерката „Самовработување – претприемништво“ се очекува да бидат отворени повеќе од 2.000 нови работни места, додека преку мерката „Поддршка за креирање нови работни места“ ќе се овозможи вработување на над 1.500 лица. Со овие две мерки, според ВМРО-ДПМНЕ, ќе бидат опфатени повеќе од 3.500 граѓани.
Посебен акцент е ставен на младите. Оперативниот план предвидува стимулации за нивно вработување во производствени капацитети, при што околу 3.500 млади до 23-годишна возраст ќе добиваат младински додаток во висина од 3.000 денари.
Од ВМРО-ДПМНЕ наведуваат дека мерките имаат за цел да создадат долгорочни ефекти преку програми за самовработување, практикантство, обуки и активности за подобрување на конкурентноста и вештините на работната сила.
Според партијата, резултатите од досегашните политики покажуваат позитивни ефекти, посочувајќи дека преку Програмата за самовработување биле отворени околу 2.200 нови деловни субјекти.
Оперативниот план за 2026 година опфаќа над 10.000 лица и предвидува буџет од речиси 40 милиони евра, а значителен дел од средствата ќе бидат насочени кон мерки за вработување. Од ВМРО-ДПМНЕ додаваат дека фокусот останува на младите, со планирано вклучување на околу 6.000 лица до 29-годишна возраст, со цел создавање поинклузивен пазар на труд и подобри услови за нивно задржување во земјата.
