Движење ЗНАМ преку соопштение побара итни и редовни инспекциски контроли на сите активни градилишта во Општина Центар, по инцидентот со свлечиштето и оштетувањата на булеварот „Теодосиј Гологанов“.
Од партијата обвинија дека локалната власт реагира задоцнето и само по настанати инциденти, наместо превентивно да ја гарантира безбедноста на граѓаните.
Во соопштението, ЗНАМ го обвини градоначалникот Горан Герасимовски дека дозволил „агресивна и небезбедна бетонизација“ на општината и дека инспекциските служби функционираат само како механизам за „гасење пожар и дефокусирање на јавноста“.
Од советничката група посочија дека граѓаните не треба да чекаат нови инциденти за институциите да почнат да постапуваат.
ЗНАМ бара во рок од еден месец да се извршат редовни и вонредни инспекциски надзори на сите активни градилишта во Центар, а извештаите јавно да бидат објавени на веб-страницата на општината.
Партијата најави дека за ова барање ќе поднесе официјална иницијатива на следната седница на Советот на Општина Центар и ги повика сите советници да ја поддржат.
„Безбедноста нема партиска книшка“, порачаа од ЗНАМ, оценувајќи дека граѓаните заслужуваат сигурност и функционален систем, а не, како што велат, „ад-хок ПР акции“.
