ЗНАМ: Колку квадрати бетон вреди едно Водно?

Движењето ЗНАМ преку соопштение соопшти дека неговите советници во Советот на Општина Центар гласале против предлогот поврзан со урбанистичкиот план за Водно, оценувајќи дека со него се отвора простор за нова бетонизација на ова подрачје.

— реклама —

Од партијата велат дека нивниот став бил дека не треба да се носат одлуки за Водно без претходни мислења од надлежните институции за можните ризици од ерозија и свлечишта, како и дека предложениот план отстапува од Генералниот урбанистички план.

— реклама —

„На седницата предупредивме дека со ваквите одлуки се доведува во опасност безбедноста на граѓаните и на идните генерации“, наведуваат од ЗНАМ.

Според партијата, предложените измени значително ги зголемуваат можностите за градење. Тие посочуваат дека процентот на изграденост се зголемува од 5,8 на 30,17 проценти, бруто-изградената површина од 6.500 на 29.459 квадратни метри, а коефициентот на искористеност од 0,17 на 0,91.

— реклама —

Од ЗНАМ тврдат дека постојат и решенија за одделни градежни парцели кои, според нив, отвораат сомнеж дали водечки критериум бил јавниот или приватниот интерес.

„Водно не е простор за тргување. Тоа е природно богатство што мора да остане за сите граѓани“, порачуваат од партијата, додавајќи дека ќе продолжат да се спротивставуваат на, како што велат, сите одлуки што го ставаат приватниот интерес пред јавниот интерес и природата.