Движењето ЗНАМ преку соопштение остро реагираше на неодамнешниот конгрес на СДСМ, оценувајќи дека најавениот „нов почеток“ и платформата „Твоја држава, твоја шанса“ не нудат суштински промени, туку претставуваат обид старите политики да се претстават како нова визија.
Од ЗНАМ велат дека шесте столба на новата програмска платформа не содржат конкретни решенија и резултати, туку, како што наведуваат, претставуваат „политички флоскули без реална содржина“.
Според партијата, слоганот „Твоја држава, твоја шанса“ неизбежно ги потсетува граѓаните на периодот кога СДСМ беше на власт и на, како што тврдат, пропуштените можности и неисполнетите ветувања.
„Контрастот меѓу политичките слогани и реалноста е преголем за да се игнорира. Пораките како ‘Живот за сите’ и ‘Нема правда – нема мир’ останаа симбол на големи очекувања, но и на неиспорачани резултати“, наведуваат од ЗНАМ.
Во реакцијата се упатуваат критики и кон раководството на СДСМ, при што се споменуваат поранешниот премиер Зоран Заев и лидерот на партијата, Венко Филипче. Од ЗНАМ обвинуваат дека партијата денес сè повеќе се оддалечува од, како што велат, државотворната улога што некогаш ја имала.
Партијата оценува дека граѓаните не бараат нови слогани и политички пораки, туку конкретни резултати, одговорност и функционални институции.
„За Движењето ЗНАМ, Македонија останува трајна државна обврска. Нашите заложби се насочени кон заштита на институционалниот интегритет, јакнење на државниот капацитет и безусловно почитување на македонскиот државен и национален интерес“, се наведува во соопштението.
Од ЗНАМ додаваат дека само преку стабилни институции, јасна државна политика и конкретни резултати може да се гради европска и просперитетна Македонија.
