ЗНАМ: „Пендаровски ја отвори Пандорината кутија: Дали правдата во Македонија се договарала зад затворени врати по барање на Никола Груевски?“

Движењето ЗНАМ на денешната прес-конференција побара целосно расчистување на наводите што ги изнесе поранешниот претседател Стево Пендаровски во емисијата „360 степени“, оценувајќи дека тие отвораат сериозни прашања за функционирањето на правниот систем и носењето на клучни политички одлуки во минатото.

— реклама —

Од партијата посочија дека станува збор за прашања од висок јавен интерес, бидејќи, според нив, изјавите на Пендаровски упатуваат на можни разговори за амнестии, враќање на лица обвинети или осудени за тешки кривични дела, како и за измени на Кривичниот законик кои подоцна имале значително влијание врз системот на кривична одговорност.

— реклама —

ЗНАМ прашува дали државните интереси биле подредени на политички договори меѓу СДСМ и ДУИ, дали измените на Кривичниот законик биле дел од однапред договорен политички план и дали одредени правосудни процеси биле предмет на политичко договарање наместо на законски процедури.

Партијата побара целосно објавување на сите факти поврзани со овие наводи, како и надлежните институции да утврдат дали постојат основи за политичка, институционална или кривична одговорност.

— реклама —

На прес-конференцијата, портпаролот на ЗНАМ, Никола Мемов, се осврна и на најавената реконструкција на Владата, посочувајќи дека движењето останува задоволно од работата на своите функционери и дека засега не очекува промени во ресорите што ги раководат кадри на ЗНАМ.

Во однос на европските интеграции, Мемов изјави дека партијата ги поздравува позитивните оценки за реформската агенда изнесени од претседателот на Европскиот совет, Антонио Кошта, особено за ресорите правда и јавна администрација, додека за извештајот на известувачот за Македонија во Европскиот парламент, Томас Вајц, рече дека ќе коментираат кога официјално ќе биде доставен во земјава.