Зошто „piano black“ полека исчезнува од ентериерите на автомобилите

Сјајната црна пластика, позната како „piano black“, со години беше речиси неизоставен детал во ентериерите на модерните автомобили. Иако многу возачи не ја сакаат поради отпечатоците од прсти и гребаниците, производителите масовно ја прифатија од две главни причини – изгледа луксузно и релативно е евтина за производство.

— реклама —

„Piano black“ остава силен впечаток во салоните, бидејќи високиот сјај делува елегантно и лесно се вклопува со која било боја на ентериерот. Уште на почетокот на минатата деценија, дизајнерите ја сметаа за трендовско решение, а таа беше присутна речиси на сите автомобилски саеми.

Покрај естетиката, важна улога имаше и производствениот процес: во соработка со добавувачи како BASF, производителите успеаја да добијат висок сјај без класичниот процес на бојадисување и лакирање, што значително ги намали трошоците и ја забрза продукцијата, пишува Jalopnik.

Сепак, маните на ваквите површини брзо станаа очигледни. Високиот сјај функционира како огледало – ја истакнува прашината, отпечатоците од прсти и дури и најситните гребаници.

Парадоксално, секое бришење го зголемува ризикот од нови микрооштетувања, па сопствениците често влегуваат во маѓепсан круг на чистење.

Дополнителна причина за ширењето на трендот со „piano black“ беше експанзијата на големите екрани во кабините. Исклучените дисплеи изгледаат слично на сјајната црна пластика, па околната декорација се користеше за да се постигне визуелно уедначен и модерен изглед на контролната табла.

Сепак, се чини дека трендот полека се менува. Сè повеќе производители кај поновите модели се откажуваат од „piano black“ деталите, бидејќи сакаат потопол и попрактичен амбиент во кабината. Купувачите, едноставно, се уморни од постојаното полирање.

Негативниот став кон „piano black“ завршната обработка не произлегува од тоа што станува збор за лош материјал, туку од фактот што високиот сјај не е благодарен во простор кој постојано се допира. Убав е на прв поглед, но тој впечаток трае многу кратко.

Ако автомобилската индустрија навистина продолжи понатаму – малкумина ќе жалат по отпечатоците од прсти.