По смртта на 13-годишно момче кое било убодено од смртоносна кубомедуза, позната и како морска оса, властите во Тајланд го засилија надзорот долж крајбрежјето и ги повикаа граѓаните и туристите на зголемена претпазливост.
Трагедијата се случила пред три дена додека момчето пливало во близина на плажата Бан Фаи Та, во округот Сичон, во покраината Након Си Тамарат.
Министерот за природни ресурси и животна средина, Сучарт Чомклин, изрази сочувство до семејството на починатото момче и му наложи на Одделот за морски и крајбрежни ресурси (DMCR) да ги засили безбедносните мерки за да се спречат нови трагедии.
Надлежните служби добиле задача да соработуваат со локалните власти, здравствените институции и туристичките компании, а ризичните плажи постојано да се следат и навремено да се предупредува јавноста.
Од граѓаните и туристите се бара да не влегуваат во морето доколку забележат опасни медузи, да ги следат упатствата на спасувачите и никогаш да не ги допираат медузите со голи раце.
Властите повторно ги објавија и насоките за прва помош. Лицето што било убодено треба веднаш да се извади од водата, да се држи мирно и без одлагање да се повика Итна медицинска помош. Местото на убодот треба најмалку 30 секунди да се полева со обичен алкохолен оцет, кој го спречува понатамошното ослободување на отровот од жарните клетки.
По третманот со оцет, преостанатите делови од пипалата треба внимателно да се отстранат со пинцета или стапче, без допирање со раце. Доколку лицето престане да дише или нема пулс, веднаш треба да се започне со реанимација.
Надлежните предупредуваат дека местото на убодот не смее да се полева со слатка вода, алкохол или да се трие, бидејќи тоа може да предизвика дополнително ослободување на отровот и да ја влоши состојбата.
За побрза реакција, на плажите со најголем ризик се поставени станици со оцет и информативни табли со упатства за укажување прва помош, а пред туристичката сезона се спроведуваат и едукативни активности за туристичките работници.
