Тајландските власти привремено го прекинаа издавањето нови дозволи за поседување, купување и носење огнено оружје, по смртоносниот напад во училиште во Нонтабури. Мерката е донесена по трагедијата во која животот го загубија повеќе лица, а истрагата за мотивот на 14-годишниот напаѓач продолжува.
Премиерот Анутин Чарнвиракул потврдил дека на Министерството за внатрешни работи и полицијата им наредил да го запрат издавањето дозволи и да воведат построги контроли и санкции за прекршувањата.
Според државниот канал NBT World, мерката ќе биде привремена и ќе остане во сила до донесувањето нов закон за контрола на оружјето. Владата планира и да определи период во кој граѓаните ќе можат доброволно да предадат нелегално оружје без да бидат кривично гонети.
Дополнителен надзор ќе биде воведен и врз службеното оружје на полицијата. Тајландските власти истовремено најавија засилена борба против нелегалната трговија со оружје, вклучително и продажбата преку интернет.
Иако земјата има релативно строги правила за издавање дозволи, Тајланд се соочува со голем број нерегистрирано оружје. Според податоците на Small Arms Survey од 2017 година, во приватна сопственост имало повеќе од 10 милиони парчиња огнено оружје, од кои над четири милиони не биле регистрирани.
Мерките следуваат во период кога во земјата се одржуваат погребните обреди за жртвите на нападот. Според досегашните информации, 14-годишниот напаѓач најпрво ги убил својата баба и својот дедо со пиштол што му припаѓал на дедо му, а потоа заминал во училиштето.
Таму биле убиени пет наставници и членови на училишниот персонал, додека 12-годишна ученичка била повредена и подоцна им подлегнала на повредите во болница.
Истрагата сè уште треба да го утврди мотивот за нападот. Полицијата претходно соопшти дека момчето на интернет гледало насилни содржини и дека еднаш во училиштето донело воздушен пиштол.
По трагедијата, Министерството за образование најави и нов план за безбедност во училиштата, кој предвидува построги проверки на влезовите и поголема психолошка поддршка за учениците.
