Поранешниот тајландски пратеник Чалонг Ривранг е уапсен под сомнение дека во провинцијата Нонтабури пукал во локалниот функционер Тонгчаи Јенпрасерт, кој подоцна починал во болница. По нападот, осомничениот телефонски се јавил кај политичка коментаторка додека таа водела емисија во живо на „Јутјуб“ и признал што направил, објави Би-би-си.
Пукањето се случило во понеделникот пред канцеларијата на Јенпрасерт. Тој бил погоден во вратот и бил пренесен во болница, но им подлегнал на повредите. Неговиот возач бил ранет во раката.
Набргу по нападот, Ривранг ја повикал водителката Анчали Паирирак, која во тој момент ја водела својата политичка емисија во живо. На снимката се гледа како водителката го прима повикот, а нејзиниот израз на лицето се менува додека го слуша соговорникот.
„Дали е мртов? Дали сте пукале во глава? Мора да ја почекате полицијата. Не мрдајте никаде“, му кажувала видно вознемирената водителка на лицето од другата страна на линијата. Иако гледачите не можеле да го слушнат Ривранг, од нејзината реакција било јасно дека тој зборува за пукањето.
По апсењето, полицијата му дозволила на Ривранг да одржи прес-конференција во полициската станица, каде што ја изнел својата верзија за настанот.
Тој тврдел дека немал намера да пука во Јенпрасерт, кого го опишал како добар пријател. Според неговите зборови, сакал само да разговара со него, но Јенпрасерт бил лут и одбил да разговара.
Ривранг навел дека Јенпрасерт го турнал и му кажал дека не сака разговор, а потоа го следел до автомобилот. Поранешниот пратеник тврди дека кога го извадил пиштолот, немал намера да пука, но возачот на Јенпрасерт извадил сопствено оружје и го вперил кон него, по што тој пукал.
Убиениот Јенпрасерт бил пензиониран полициски полковник и претседател на Покраинската административна организација на Нонтабури. Локалните медиуми објавија дека тој и Ривранг имале личен конфликт.
Случајот повторно го отвори прашањето за контролата на оружјето во Тајланд, само неколку дена по друг тежок вооружен инцидент во земјата. Иако двата настана не се поврзани, властите најавија засилени мерки за контрола на поседувањето и употребата на огнено оружје.
Тајланд има една од највисоките стапки на поседување оружје во Југоисточна Азија. Премиерот Анутин Чарнвиракул нареди засилено спроведување на законите за оружје и најави полициски контролни пунктови и построги проверки на поседувањето и носењето оружје.
