Француско семејство поминало повеќе од 16 часа на отворено море во близина на Тајланд, откако изнајмениот џет-ски им се превртел за време на возењето.
Педесетгодишниот татко и неговите два сина, на возраст од пет и седум години, останале во морето до пристигнувањето на спасувачите. По спасувањето, тројцата биле исцрпени и пребледени, а проголтале и морска вода. Биле пренесени во болница на преглед, но набрзо биле пуштени.
Семејството во четвртокот околу 17 часот по локално време изнајмило џет-ски на островот Кох Самуи. Возењето требало да трае 45 минути, но пловилото не се вратило во предвиденото време, по што била започната потрага.
Во потрагата се вклучиле локални жители со глисери и други џет-скија, а областа околу Кох Самуи била пребарувана во правец на соседниот остров Кох Фанган. Потрагата во текот на ноќта била прекината, а семејството било пронајдено следниот ден.
Спасувачите ги пронашле таткото и неговите синови во петокот околу 10 часот наутро. Таткото објаснил дека ги погодиле силни бранови, поради што моторот престанал да работи пред истекот на времето за кое го изнајмиле пловилото.
На снимките од спасувањето се гледа едно од момчињата како седи на предниот дел од џет-скито, додека поголемиот дел од пловилото е под вода. Таткото пловел во близина и им мавтал на спасувачите. И двајцата носеле појаси за спасување.
Мајката и постарата сестра ги чекале на плажата додека траела потрагата. По инцидентот, семејството останало во Тајланд и го продолжило одморот.
