Тајландските власти започнаа истрага за клиника во Бангкок откако 43-годишниот британски претприемач и инфлуенсер Иго Убирибо починал по третман за зголемување на пенисот. Според наодите на лондонскиот мртовечник, смртта настанала на 6 март и била директно поврзана со инјектирање хијалуронска киселина.
Случајот повторно го отвори прашањето за безбедноста на медицинскиот туризам во Тајланд, кој е една од водечките светски дестинации за естетски медицински процедури. Убирибо, познат на социјалните мрежи како Тајни и Иго, имал околу 185.000 следбеници на Инстаграм, каде што често објавувал фотографии од луксузниот живот со сопругата Даниел.
Тајландското Министерство за здравство наредило истрага, а негови службеници во понеделникот ја посетиле клиниката во централниот дел на Бангкок. Од Министерството потврдиле дека се проверува дали клиниката поседувала важечка дозвола за работа и дали биле почитувани сите здравствени и безбедносни протоколи. Паралелно, случајот го истражува и полицијата.
Според извештајот на британскиот мртовечник од август, Убирибо по примањето на филерот отишол на масажа, каде што се пожалил на болки во градите и се онесвестил. Итно бил пренесен во болница поради сомневање за белодробна емболија, но ја изгубил свеста пред лекарите да успеат да направат компјутерска томографија.
Медицинскиот персонал повеќе од 100 минути се обидувал да го реанимира, но смртта била констатирана околу еден часот по полноќ. Во извештајот се наведува дека обдукцијата и токсиколошките анализи покажале дека причината за смртта била инјекцијата со хијалуронска киселина.
Тајландскиот министер за здравство Патана Промфат изјавил дека се залага за највисоко ниво на претпазливост при сите медицински постапки. Тој посочил дека целта на истрагата е да се обезбеди правичност за сите и да се увери домашните и странските пациенти дека во Тајланд добиваат безбедна и квалитетна здравствена грижа.
Од раководството на клиниката, според податоците што ги пренесува Министерството за здравство, навеле дека Убирибо бил нивен редовен пациент од 2024 година. Наводно, тој претходно поминал четири третмани за зголемување на пенисот со инјекции.
Првите четири процедури биле изведени во текот на 2024 и 2025 година, додека при петтата посета, на 5 март, му биле дадени 40 милилитри филер. Од клиниката на истражителите им кажале дека лекарот препорачал постапката да се подели во две сесии, но Убирибо инсистирал целата количина да му биде вбризгана одеднаш.
Филерите со хијалуронска киселина често се користат во естетската медицина и генерално се сметаат за минимално инвазивни процедури. Тајланд во последните години се наметна како значаен центар на медицинскиот туризам, а пазарот на естетски третмани бележи брз раст.
Според официјалните податоци за 2024 година, во земјата работат околу 7.000 естетски клиники, од кои околу 2.000 се наоѓаат во Бангкок. Се проценува дека до 2027 година вредноста на пазарот на естетски третмани ќе достигне 7,51 милијарди долари, што е речиси трипати повеќе во споредба со 2020 година.
