Вкупно 14 пожари на отворен простор се регистрирани денеска до 13 часот, информира Центарот за управување со кризи (ЦУК). Од нив, пет се активни, еден е ставен под контрола, а осум се изгаснати.
Најголем активен пожар е на територијата на општините Студеничани и Зелениково, на потегот Моране – Вртекица – Рамни Габер, со крак кон селата Палиград и Вражале. Горнo шумска вегетација.
Активен пожар има и во Општина Македонски Брод, кај селото Драгов Дол, на местото Видуш и во близина на Локвица, каде што гори ниска вегетација, нискостеблеста шума и грмушки.
Во Општина Илинден се регистрирани два активни пожари – кај Логистичкиот центар на КАМ и во селото Бујковци, каде што гори ниска вегетација. Активен пожар има и во Општина Сарај, во селото Бојане, каде што гори шума.
Пожарот во Општина Кичево, кај селото Тајмиште, на местото Дарда, е ставен под контрола. Таму гори високостеблеста букова шума.
Во текот на денот се изгаснати осум пожари. Тие биле регистрирани во Струмица, Василево, Делчево, Куманово, Јегуновце, Гостивар и Врапчиште, а горела ниска вегетација, шума и отпад.
