Левица преку соопштение реагира на одлуката на Обвинителството да го затвори предметот за набавката и поставувањето на модуларните болници, оценувајќи дека трагедијата во Тетово повторно ја отвора темата за институционалната неказнивост и политичката одговорност.
Од партијата велат дека пет години по пожарот во модуларната болница во Тетово, во кој животот го загубија 14 лица, јавноста сè уште нема одговорност на ниво на политичкиот и бизнис-вријот.
„Четиринаесет луѓе загинаа, пет години поминаа, три обвинителки го менуваа предметот, две влади се сменија, а политичко-бизнис врвот повторно излегува без правен товар од целата приказна“, наведуваат од Левица.
Според партијата, случајот е пример за систем во кој криминалните сомневања стануваат предмети, предметите се претвораат во предистраги, а потоа завршуваат во фиоки, архиви или со застарување, за повторно да бидат актуелизирани во политички пресметки.
Левица оценува дека политичките конфронтации меѓу ВМРО-ДПМНЕ и СДСМ често се најостри во јавноста, но дека кога станува збор за конкретна одговорност, системот не обезбедува соодветен епилог.
Од партијата ја посочуваат и политичката реторика меѓу Христијан Мицкоски и Венко Филипче, оценувајќи дека обвинувањата за корупција, милиони и криминални шеми најчесто остануваат дел од политичките прес-конференции, без соодветни правни последици.
Во реакцијата се повикуваат и на измените на Кривичниот законик, за кои велат дека со кворум обезбеден од ВМРО-ДПМНЕ бил отворен простор за застарување на одредени крупни предмети.
Левица го споменува и Кочо Анѓушев, поранешен вицепремиер во Владата предводена од СДСМ и сопственик на „Брако“, компанија која била избрана за набавка на модуларните болници. Од партијата притоа ја нагласуваат и неговата долгогодишна поврзаност со бизнис и академските кругови во кои се движел и актуелниот премиер Христијан Мицкоски.
Дополнително, Левица се повикува на информации објавени од ИРЛ, според кои обвинителката која го затворила предметот не презела ново истражно дејствие и немала информација за посебен ревизорски извештај во кој се отворало прашањето за дополнително подобрување на техничките барања со цел поголема безбедност по пожарот.
Од партијата оценуваат дека ваквиот развој на настаните покажува дека политичките елити можат жестоко да се обвинуваат меѓусебно, но истовремено да останат далеку од суштинска правна одговорност.
„Не можеме да говориме за плурализам, туку за поделба на пленот – две партиски структури, ист систем на неказнивост, исти недопирливи олигархиски интереси и држава сведена на гарант на нивниот политички и економски опстанок“, се наведува во реакцијата.
