1.600 хектари под пламен во Белгија: Три хеликоптери и два канадери пристигнаа од ЕУ

Белгија побара итна помош од Европската Унија во борбата со големиот шумски пожар што со денови беснее во природниот резерват Хоес Фањ, на истокот од земјата. Во одговор на барањето, европските земји испратија три хеликоптери и два канадери за да помогнат во ставањето на огнот под контрола.

— реклама —

Пожарот во најголемиот природен резерват во Белгија избувна во петокот, а досега изгореле околу 1.600 хектари, според податоците на гувернерот на провинцијата Лиеж, што ги пренесуваат локалните медиуми.

— реклама —

Станува збор за најголемиот регистриран пожар во Белгија досега, надминувајќи го пожарот од 2011 година, кога беа зафатени речиси 1.400 хектари.

Во гаснењето се вклучени локални пожарникари, земјоделци и припадници на армијата, кои се обидуваат да го спречат натамошното ширење на огнот. За интервенциите се користи и вода од локалните езера.

— реклама —

Авионот и хеликоптерите испратени преку механизмот на ЕУ пристигнале од Чешка, Шведска и Холандија. Европската комисија го координира распоредувањето дополнителни ресурси кога земја членка ќе побара итна помош.

— реклама —

Пожарот избувна во услови на исклучително топло и суво време, откако голем дел од Европа е погоден од петтиот топлотен бран годинава. Научниците предупредуваат дека климатските промени придонесуваат за создавање услови во кои шумските пожари полесно се шират и траат подолго.