17. ден протести во Албанија: Студентите и граѓаните бараат оставка од Еди Рама

Незадоволството од албанската влада и политичката класа и натаму ги изведува граѓаните на улиците во Тирана, каде што студентите, младите и претставниците на граѓанското општество 17. ден по ред протестираат пред зградата на Советот на министри.

— реклама —

Денешните демонстрации во главниот град на Албанија поминаа мирно, без пријавени инциденти и судири со полицијата. На студентите им се придружија и универзитетски професори и претставници на граѓански организации.

— реклама —

Протестот започна во близина на албанскиот парламент, каде што полицијата постави метални огради за обезбедување на просторот. Потоа демонстрантите се упатија кон Министерството за образование, а на крајот повторно се собраа пред зградата на владата.

— реклама —

Повеќе од две недели демонстрантите бараат оставка од премиерот Еди Рама. Иако тој повеќепати ги повика студентите на дијалог, тие ја одбија поканата и останаа на барањето за негово заминување од власт.

За разлика од некои претходни собири, кои беа проследени со судири и насилство, последните демонстрации поминаа без тензии. Засега нема договор меѓу владата и демонстрантите за почеток на разговори, а протестите продолжуваат.