Во Македонија во текот на изминатото деноноќие биле регистрирани 31 пожар на отворен простор, од кои два и натаму се активни, пет се ставени под контрола, а 24 се целосно изгаснати, информира Центарот за управување со кризи.
До 7:30 часот денеска активни остануваат пожарот во атарот на скопското село Грачани, во општина Ѓорче Петров, кој се протега и на територијата на Косово и зафаќа шумски предел, како и пожарот кај селото Белица, во месноста Кајорец во општина Македонски Брод, каде што гори борова шума.
Под контрола се ставени пет пожари. Во општина Струга пожарот се движи на потегот Буринец–Локов–Селци, каде што е зафатена нискостеблеста шума. Под контрола е и пожарот кај Копаница во општина Сарај, со нискостеблеста шума и ниска вегетација.
Пожар е ставен под контрола и во месноста Рамно кај селото Брест во општина Чучер-Сандево, каде што гори мешана шума. Во Кратово под контрола е пожарот на депонијата, како и пожарот на градската депонија во Делчево.
Во текот на деноноќието се изгаснати вкупно 24 пожари на различни локации низ земјата.
Интервенции имало во општините Сарај, Гази Баба, Арачиново, Сопиште, Новаци, Битола, Струмица, Радовиш, Дојран, Струга, Македонски Брод, Градско, Лозово, Виница, Кочани, Куманово, Липково, Теарце, Желино, Гостивар и Маврово и Ростуше.
Најчесто гореле ниска вегетација, нискостеблеста и мешана шума, стрништа, грмушки и отпад, а во дел од случаите биле зафатени депонии и борови насади.
Меѓу изгаснатите пожари се оние кај Копаница и Горна Арнакија во Сарај, во Стара Комуна во Гази Баба, на депонијата во Грушино, кај Барово во Сопиште, Тепавци во Новаци, како и на повеќе локации во Струмица, Радовиш, Дојран, Струга, Македонски Брод, Градско, Лозово, Виница, Кочани, Куманово, Липково, Теарце, Желино, Гостивар и на планината Бистра.
ЦУК продолжува да ја следи состојбата со пожарите и ги координира надлежните институции и служби на терен.
