Трагичен епилог доби потрагата по 31-годишен скопјанец, кој претходно бил пријавен за исчезнат во Охрид.
На 15 септември во 22 часот, по преземени мерки од полициски службеници од Езерската полиција и од СВР Охрид, во водите на Охридското Езеро бил пронајден починат Б.С. (31) од Скопје. Телото било лоцирано во близина на автокампот, на околу 50 метри од копното.
Лекар од Итната медицинска помош констатирал смрт без траги на насилство, а препознавањето на починатиот го извршил член на неговото семејство.
По насоки на јавен обвинител, врз телото на починатиот ќе биде извршена обдукција, која треба да ги утврди околностите и причината за смртта.
Б.С. претходно бил пријавен за исчезнат на 14 септември во 18:10 часот во СВР Охрид. Пријавата ја поднел неговиот татко, З.С. (68) од Скопје, кој посочил дека неговиот син исчезнал додека заедно престојувале во автокамп во Охрид.
