Претседателката Гордана Сиљановска-Давкова вели дека одлуката да ја помилува 71-годишната Шефије Јакупи од кичевското село Зајас била донесена поради долгогодишното семејно насилство на кое, според неа, жената била изложена.
Јакупи поминала 17 и пол години во затвор поради убиството на својот сопруг. Сиљановска-Давкова посочи дека повеќепати ги разгледала околностите на случајот и дека, иако станува збор за сурово убиство, не може да се занемари фактот дека Јакупи повеќе од 35 години трпела континуирано насилство.
„Многупати го прочитав делото. Се работи за сурово убиство, но веројатно јавноста знае дека таа жена била подложена на продолжено насилство повеќе од 35 години. Мислев дека јас како жена морам да имам разбирање за еден живот што од утро до вечер бил исполнет со насилство“, изјави претседателката.
Таа нагласи дека претседателската функција ѝ овозможува да донесе одлука за помилување и оцени дека Јакупи, како жена, мајка и сопруга која, според неа, целиот живот била изложена на насилство, заслужува староста да ја помине на слобода.
„Многу би сакала крајот на животот или староста да го доживее на слобода. Мислам дека го заслужува тоа“, рече Сиљановска-Давкова.
Претседателката додаде дека Јакупи е меѓу лицата кои долго време издржувале затворска казна.
„Таа е човечко суштество, отслужила многу, а мислам дека од мене заслужува разбирање. Мислам дека секоја друга жена на моето место, како претседателка, би го сторила истото“, порача Сиљановска-Давкова.
