Сиљановска-Давкова се сретна со спелеонуркачите по историскиот подвиг во пештерата Врело

Пештерата Врело во кањонот Матка испиша историја со истражена длабочина од 338 метри, со што стана најдлабоката подводна пештера во светот истражена од човек. За овој значаен успех, учесниците во меѓународната експедиција „Врело 2026“ и членовите на Спелеонуркачкиот клуб „Врело“ ја информирале претседателката Гордана Сиљановска-Давкова на средбата што се одржала вчеравечер.

— реклама —

Сиљановска-Давкова им честитала на спелеонуркачите за извонредниот подвиг, оценувајќи дека Врело е природен феномен што го поттикнува истражувачкиот дух и желбата за откривање на тајните на природата.

Според претседателката, светскиот рекорд е признание за знаењето, храброста и истрајноста на спелеонуркачите, но и значајна можност за меѓународна афирмација на македонското културно наследство.

— реклама —

За време на средбата, учесниците раскажале за предизвиците со кои се соочиле при истражувањето, како и за откритијата во подводниот свет на Врело. Меѓу нив се кристално чистата вода, температурата од околу 15 степени, два новооткриени канала и повеќе од 150 метри нови, големи пештерски ходници.

— реклама —

Спелеонуркачите ја опишале Врело како раскошен и мистериозен природен феномен со посебна привлечност, истакнувајќи дека станува збор за една од најинтересните подводни пештери што досега ги истражувале.

Тие ѝ се заблагодариле на претседателката за прифатеното генерално покровителство, нагласувајќи ја неговата важност за успешната реализација на експедицијата.

Сиљановска-Давкова им посакала успех во идните истражувања, изразувајќи уверување дека нивниот подвиг ќе биде инспирација за многу други спелеонуркачи.