Одбележувањето на 35-годишнината од независноста на државата ќе продолжи денеска во Вила Водно со прием на ученици кои постигнале значајни успеси на меѓународни научни натпревари.
Претседателката Гордана Сиљановска-Давкова ќе ги прими учениците од основните и средните училишта и нивните ментори кои во учебната 2025/2026 година учествувале на меѓународни научни олимпијади и натпревари. Дел од младите учесници освоија медали, награди и признанија.
На приемот ќе присуствува и министерката за образование и наука Весна Јаневска, информираат од Кабинетот на претседателката.
Во рамки на програмата, со почеток во 9 часот, ќе се одржи панел-дискусија „8 Септември низ призма на негови непосредни учесници и сведоци“.
На панелот ќе учествуваат Сиљановска-Давкова, како и поранешни политичари и државни функционери, пратеници, новинари и други јавни личности кои непосредно биле дел од или ги следеле настаните поврзани со создавањето на независната држава.
Тие ќе ги споделат своите сведоштва и видувања за политичките, институционалните и општествените процеси што доведоа до прогласувањето на независноста на Македонија.
