39-годишник осомничен дека му се заканувал на премиерот Мицкоски, Обвинителството бара притвор

Основното јавно обвинителство Куманово поведе постапка против 39-годишен жител на селото Черкези, осомничен дека преку социјалните мрежи го навредувал и му се заканувал на премиерот Христијан Мицкоски.

Според Обвинителството, постои основано сомнение дека 39-годишникот сторил кривично дело „Загрозување на сигурноста“ од член 144 став 5 од Кривичниот законик.

— реклама —

„Осомничениот, во пораки преку социјални мрежи, го навредувал и му се заканувал на претседателот на Владата на РСМ“, соопштија од Обвинителството.

— реклама —

Јавниот обвинител побарал од судијата на претходна постапка на осомничениот да му биде определена мерка притвор.

При барањето притвор, Обвинителството ги ценело околностите под кои е извршено делото и ризикот од бегство, но и претходното поведение на осомничениот.

— реклама —

Според ОЈО, тој се јавува како извршител и на други кривични дела од областа на насилниот криминал, меѓу кои насилство и лихварство, а има и поголем број прекршоци за нарушување на јавниот ред и мир.

— реклама —

„Станува збор за конфликтна личност која влегува во постојани расправии, закани и физички пресметки со пријавители, па се оценува дека постои реален ризик ваквите агресивни испади да прераснат во потешки кривични дела со животозагрозувачки последици со кои се заканува“, наведуваат од Обвинителството.

За предлогот на обвинителот за определување притвор треба да одлучи судија на претходна постапка.