Мицкоски ги повика жителите на Брвеница да гласаат за Стојанче Радичевски

Со порака за обединување, развој и надминување на етничките и политичките поделби, претседателот на Владата, Христијан Мицкоски, се обрати на завршниот митинг во Брвеница, од каде што ги повика граѓаните во недела да го поддржат кандидатот за градоначалник Стојанче Радичевски, познат како Цоки, и да го заокружат бројот 1.

Мицкоски порача дека Брвеница треба да биде општина за сите граѓани, без разлика на нивната етничка, верска или политичка припадност. Според него, развојот не се мери само преку изградбата на улици, водоводи и училишта, туку и преку довербата меѓу луѓето и функционалноста на институциите.

— реклама —

Во обраќањето упати критики кон коалицијата предводена од ДУИ, обвинувајќи ја за политички поделби, недостиг од проекти и ставање на личните интереси пред потребите на граѓаните. Тој оцени дека во периодот кога ДУИ била дел од власта, повеќе од две децении, не биле реализирани доволно проекти за Брвеница.

— реклама —

Како примери за сегашните активности, Мицкоски ги наведе изградбата на спортски сали и игралишта, обновувањето на училиштата и асфалтирањето патишта. Посочи дека жителите на Брвеница заслужуваат подобри услови за живот, чиста вода, безбедни патишта и функционални јавни услуги.

Посебно им се обрати на младите, нагласувајќи дека Владата треба да работи на создавање услови во кои заминувањето од Македонија нема да биде нужност, туку личен избор. Тој рече дека целта е младите да можат да најдат можности за работа, создавање семејство и напредување во сопствената земја.

— реклама —

Во дел од говорот Мицкоски раскажа и за посетата на селото Теново, каде што, според неговите зборови, жител му посочил дека христијаните и муслиманите со векови живеат едни покрај други, се почитуваат и се молат на ист Бог во различни верски храмови. Тој порача дека политичарите не треба да ги делат граѓаните по етничка и верска основа, бидејќи жителите на Брвеница и по изборите ќе продолжат да живеат заедно.

Мицкоски упати и критики за одлуката на Врховниот суд од 22 октомври во предметот поврзан со пожарот во модуларната болница, повикувајќи ги граѓаните да се запрашаат каква правда сакаат за Македонија.

На крајот од обраќањето, тој повторно ги повика жителите на Брвеница да гласаат за Стојанче Радичевски, нагласувајќи дека на Македонија ѝ се потребни нови успеси, резултати и проекти, а не поделби.