Мицкоски очекува победа во Брвеница

Премиерот и лидер на ВМРО-ДПМНЕ, Христијан Мицкоски, очекува победа на кандидатот на партијата во вториот круг од локалните избори во Брвеница, при што целта е да се освојат повеќе од 4.000 гласови.

— реклама —

На последниот ден од изборната кампања, Мицкоски најави завршно обраќање пред жителите на општината и потсети дека ВМРО-ДПМНЕ во првиот круг освоило речиси 3.000 гласови. Тој очекува поддршката во вториот круг да биде поголема и да донесе изборна победа.

— реклама —

Осврнувајќи се на кампањата, Мицкоски ја обвини коалицијата што го поддржува противкандидатот дека ја засновала својата стратегија врз етнички поделби, наместо да им се обраќа на граѓаните преку конкретни проекти. Тој порача дека по изборите жителите на Брвеница, без разлика на нивната етничка и верска припадност, ќе продолжат да живеат заедно.

— реклама —

Мицкоски ги повика граѓаните да избираат според резултатите и проектите, а не според политиките што, како што рече, ги враќаат во минатиот век. Според него, треба да се даде предност на решенијата што го подобруваат квалитетот на животот и носат конкретна корист за граѓаните.

Тој изрази очекување изборниот ден во недела да помине мирно, без поголеми инциденти, оценувајќи дека тоа ќе биде показател за демократската зрелост на општеството.