Претседателот на Гвинеја-Бисао: Пораката на Путин стигна до Зеленски
Претседателот на Гвинеја-Бисао, Умаро Мохтар Сисоко Ембало изјави дека рускиот претседател Владимир Путин побарал од него да достави „порака“ до Владимир Зеленски.
Пораката се однесува на важноста на „директниот дијалог“ меѓу Москва и Киев. Ембало го откри ова на заедничката прес-конференција со Зеленски во Киев, еден ден по средбата со Путин.
„Драг мој брат, вчера бев во Русија со претседателот Путин, кој ме замоли да ви дадам порака, да разговараме со вас, имајќи предвид дека директниот дијалог е многу важен за нашите идни заеднички акции“, рече Ембало.
Снимката од прес-конференцијата е објавена на каналот Телеграм на Зеленски, а Ембало е преведен на украински.
Претседателот на Гвинеја-Бисао откри и дека се гледа себеси како „носител на одредени импулси“ кои придонесуваат за обновување на односите меѓу Русија и Украина. Пред средбата со Зеленски, Ембало им рече на новинарите дека верува оти Путин е „многу отворен за преговори со претседателот Зеленски“ и дека со нетрпение очекува „да му ја пренесе оваа добра волја“ на украинскиот лидер.
Зеленски, одговарајќи на прес-конференцијата на изјавите на Ембалo, рече дека за да изградиме мостови меѓу земјите „не треба да ја креваме во воздух инфраструктурата“.
Зеленски очигледно мислеше на нападите врз украинските електрани што ги започна Русија на 10 октомври, во она што Москва го опиша како одмазда за „терористичкиот напад“ на Киев на мостот на Крим. Украинскиот лидер исто така рече дека секој разговор подразбира почитување од една до друга земја, почнувајќи од почитување на „нејзиниот територијален интегритет, суверенитет и граници“.
Претходно овој месец, Путин го наведе одбивањето на Украина да разговара како причина за отсуството на разговори меѓу двете земји. Тој исто така истакна дека за време на преговорите со посредство на Турција на крајот на март, Русија и Украина постигнаа прелиминарен договор, но штом руските војници беа повлечени од Киев, „раководството во Киев изгуби секаква желба за разговори“. Забелешките на Путин дојдоа веднаш откако Зеленски потпиша указ за забрана на какви било преговори со него и велејќи дека Украина ќе разговара со Русија само кога ќе има друг претседател.
Украинскиот лидер постојано изјавува дека неговата единствена цел во конфликтот е да ја победи Русија на бојното поле и да ја врати контролата врз сите територии за кои Киев верува дека се под негов суверенитет.
