„Ќе се погрижиме Кремљ да биде поразен и во сајбер просторот“, вели британски министер
Почнува борбата против „Турла“: „Ќе го победиме Кремљ“
Велика Британија ангажирала експерти за сајбер безбедност за да ја заштитат Украина од руски хакери, пишува лондонски Тајмс.
Од февруари, сајбер експерти работат од далечина како дел од британската владина програма вредна 6,35 милиони фунти или 7,38 милиони евра.
Штом руските сили ја преминаа украинската граница на 24 февруари, во рок од 35 минути тим од сајбер експерти тргна на работа за заштита на украинските министерства од очекуваните напади. Програмата за кибер-помош за Украина ја води Министерството за надворешни работи со помош на Националниот центар за сајбер безбедност (NCSC), според Тајмс.
Британскиот министер за надворешни работи Џејмс Клеверли вети дека ќе продолжи да обезбедува ИТ поддршка за украинските сили.
„Заедно ќе се погрижиме Кремљ да биде поразен во сите сфери: на копно, во воздух и во сајбер просторот“, истакна министерот Клеверли. Рускиот напад врз Украина не е ограничен само на копнена инвазија, предупредува британскиот министер, Москва упорно се обидува да го нападне украинскиот сајбер простор, загрозувајќи ги критичните информации, услуги и инфраструктура.
Меѓу другото, Британците открија дека руски хакери читаат мејлови за тоа како членките на НАТО ќе одговорат на инвазијата, бидејќи во еден момент ја пробиле сајбер одбраната на една од земјите на ЕУ. Руски агенти се осомничени за инфилтрирање на клучните украински министерства и вметнување УСБ-дискови во компјутерите. Покрај Русите, Украина е изложена на сајбер напади од кинески, ирански и белоруски хакери, пишува Тајмс. Кина е обвинета за економска шпионажа за да им помогне на своите компании да добијат работа во повоената реконструкција.
Руските обиди да ја дестабилизира Украина со хакерски напади се вообичаени по анексијата на Крим во 2014 година. Таа војна вклучи, меѓу другото, сајбер напади врз електричната мрежа и напади врз компјутерските системи на метрото во Киев и аеродромот во Одеса. Во пресрет на инвазијата на Украина, активноста на руските хакери се засили. Меѓу другото, тие ги нападнаа и украинските телекомуникациски мрежи за да ја оневозможат работата на надзорните камери и мобилните телефони. Еднаш ги сменија титловите за време на говорот на претседателот Владимир Зеленски.
Британските тимови за сајбер безбедност одговорија на нападите врз 30 украински владини тела, пишува лондонски тајмс. Се верува дека и други земји од ЕУ, вклучувајќи ги Германија и Естонија, ја поддржуваат сајбер одбраната.
Елита Турла
Сите три руски разузнавачки агенции се вклучени во сајбер операции во Украина, но најсофистицираните хакери припаѓаат на групата Турла. Основана во 90-тите, таа е најтајната и најтешка за откривање, пишува Тајмс. Тaa ги извршува своите напади со хируршка прецизност, резервирани за истакнати цели. Операцијата Турла беше откриена од британски тимови за сајбер безбедност на две локации во Украина по техничка грешка на руски хакери. Турла е поврзан со ФСБ, една од трите главни руски разузнавачки агенции. СВР и ГРУ исто така се занимаваат со хакирање во Украина.
Се верува дека ГРУ стои зад повеќето сајбер напади врз Украина. Западните власти веруваат дека СВР стои зад нападот врз земја на ЕУ што им дозволи на руските агенти да читаат мејлови за одговорот на НАТО на инвазијата.
