Поранешен инженер на ЦИА осуден на 40 години за објавување информации на Викиликс
![](https://skopje1.mk/wp-content/uploads/2019/01/prislusuvanje-kabli-35wp78d14y6aljmbcsszr4.jpg)
Поранешниот софтверски инженер на американската Централна разузнавачка агенција Џошуа Шулте, кој го откри најкласифицираниот материјал во историјата на агенцијата, е осуден на 40 години затвор. Шулте (35) во четвртокот беше осуден за организирање на најголемото протекување доверливи материјали во историјата на ЦИА, кое го откри на Викиликс, објави ABC News.
Федералните обвинители тврдеа дека истекувањето на доверливи информации имало катастрофални последици за ЦИА и дека немало алтруистички мотив во постапките на Шулте. Обвинителите тврдат дека тоа е чин на одмазда кон претпоставените кои го префрлиле на друга работа, му укинале некои од привилегиите за ИТ и го критикувале за неговото однесување.
Во август, американскиот суд во голема мера го потврди обвинението против Шулте за најголемата кражба на доверливи информации во историјата на ЦИА, додека обвинението за опструкција беше отфрлено.
Во март 2017 година, Викиликс почна да објавува материјали поврзани со тоа како ЦИА ги надгледувала странските влади, наводните терористи и други, компромитирајќи ја нивната електроника и компјутерски мрежи. ЦИА соопшти дека Шулте „директно го загрозил персоналот, програмите и средствата на Агенцијата и ја загрозил националната безбедност на САД“.
Минатиот септември, Шулте беше осуден и за поседување детска порнографија.
![](https://skopje1.mk/wp-content/uploads/2022/01/2222.png)