Палестинскиот претседател Махмуд Абас го повика американскиот претседател Доналд Трамп да ги исполни ветувањата што, според него, им ги дал на арапските земји и да преземе чекори за спречување на раселувањето на Палестинците и анексијата на палестинските територии.
Абас ова го порача во однапред снименото обраќање на 81. заседание на Генералното собрание на Обединетите нации. Тој втора година по ред не присуствуваше лично на заседанието.
Палестинскиот претседател ги повика САД да соработуваат со палестинското раководство и меѓународната заедница за спроведување на решението за две држави, засновано врз меѓународното право.
Абас рече дека Палестинците го поздравуваат мировниот план на Трамп, но оти досега не забележале напредок на терен.
Тој предупреди и на опасноста од повторување на Накба, термин со кој Палестинците се повикуваат на масовното раселување и протерување на Палестинците во 1948 година.
Според Абас, палестинскиот народ се соочува со еден од најопасните периоди во својата историја, при што посочи на жртвите, разорувањето, гладот и, како што рече, обидите за присилно раселување во Појасот Газа.
Абас истакна дека секој преоден период на крајот треба да доведе до повторно обединување на Појасот Газа и окупираниот Западен Брег под една палестинска држава со една легитимна вооружена сила.
Тој исто така го обвини Израел дека задржува повеќе од шест милијарди долари палестински средства и побара нивно итно ослободување.
Палестинскиот претседател ги отфрли и мерките со кои нему и на членовите на палестинската делегација им било оневозможено учеството во Генералното собрание, оценувајќи дека таквите ограничувања ги прекршуваат обврските на САД како земја домаќин на Обединетите нации.
Абас го повика Вашингтон да ги укине мерките и да му овозможи на палестинското раководство целосно да учествува на состаноците на Обединетите нации.
