Центарот за управување со кризи (ЦУК) денеска до 13 часот регистрирал вкупно 12 пожари на отворен простор, од кои осум сè уште се активни, додека четири се целосно изгаснати.
Активни пожари има во повеќе делови од земјата. Најголем број жаришта се регистрирани на територијата на Прилеп, Новаци и Могила, каде што гори ниска вегетација на повеќе краци во близина на селата Чаниште, Крушевица, Лопатица, Орле и Мојно.
Пожари се активни и во атарите на селата Белушино и Јакреново во Крушево, каде што се зафатени ниска вегетација и деградирана дабова шума, како и на релацијата Моране – Вртекица – Рамни Габер во Студеничани, каде што гори мешана шума.
Во Македонски Брод пожарите се регистрирани на местото Видуш, кај селата Драгов Дол и Локвица, со зафатена ниска вегетација, нискостеблеста шума и грмушки. Активен пожар има и кај Тајмиште, во месноста Дарда, во Кичево, каде што гори високостеблеста букова шума.
Пожари се регистрирани и кај селата Караслари во Велес, Никуштак во Липково, како и Кучкарево и Градиште во Куманово.
Во текот на денот се регистрирани и четири изгаснати пожари. Тие биле во селото Калугерци во Радовиш, кај стадионот во населбата Фазанерија во Гостивар, во месноста Ило Виларов во Неготино и во Ново Село во Струга.
ЦУК продолжува да ја следи состојбата на терен и да ги координира надлежните служби за справување со активните пожари.
