Поранешниот заменик-министер за животна средина и просторно планирање, Јани Макрадули, оценува дека податокот за 5.000 помалку запишани ученици претставува сериозен аларм и порача дека е време да престане, како што вели, ПР-водењето на државата.
Според Макрадули, демографијата не смее да биде партиска тема или прашање што ќе се става „под тепих“, туку национален приоритет околу кој треба да постои согласност.
„Молкот не е неутралност, тој е соучесништво“, наведува Макрадули, додавајќи дека и власта и опозицијата имаат заедничка одговорност да изградат политики што ќе ги задржат луѓето во државата.
Тој смета дека разумот мора да ги замени прес-конференциите, соопштенијата и политичките навреди, предупредувајќи дека, доколку продолжи сегашниот пристап, државата ќе се соочи со уште поголем недостиг на луѓе што ќе работат и создаваат.
Макрадули ја повикува Владата да престане да демонстрира сила и да покаже разум, оценувајќи дека политиката се гради со работа, резултати и доверба кај граѓаните, а не со притисоци или насилство. Според него, нема оправдување за идните последици доколку денес се молчи за демографските проблеми.
