Скопје денеска е домаќин на 49. пленарна седница на Здравствената мрежа на Југоисточна Европа (SEEHN), настан што ги обединува претставниците на земјите од регионот со цел унапредување на здравствените политики и зајакнување на регионалната соработка.
На отворањето на седницата, министерот за здравство Азир Алиу истакна дека Здравствената мрежа веќе четврт век успешно ги поврзува земјите од регионот околу заедничката цел – подобро здравје и поголема благосостојба за граѓаните.
„Здравствената мрежа прерасна во силна меѓувладина организација, која денес обединува девет земји членки и претставува значајна платформа за размена на искуства, градење капацитети и унапредување на здравствените политики“, рече Алиу.
Тој нагласи дека во фокусот на годинашната пленарна седница се теми поврзани со дигиталните здравствени иновации, зајакнувањето на лидерството и улогата на медицинските сестри, како и подготвеноста на здравствените системи за справување со кризни и вонредни состојби.
Министерот потенцираше дека државата останува посветена на дигиталната трансформација на здравствениот сектор, унапредувањето на сестринската професија и јакнењето на капацитетите за одговор на здравствени закани и итни ситуации.
Во своето обраќање, Алиу најави и регионална конференција на министрите за здравство од Југоисточна Европа, која на негова иницијатива ќе се одржи во септември под покровителство на Светската банка, со цел продлабочување на соработката и размена на добри практики.
Учесниците на пленарната седница ќе разговараат за заедничките предизвици и можности за развој на поотпорни, поефикасни и поинклузивни здравствени системи во регионот.
