Предлог-законот за заштита од употреба на производи од тутун и сродни производи помина во прво читање на пленарна седница во Собранието, што според министерот за здравство Азир Алиу претставува значаен чекор кон посилна заштита на јавното здравје и создавање побезбедна средина за граѓаните.
„Ова е уште еден важен институционален чекор кон посилна заштита на јавното здравје, особено на децата, младите, непушачите и сите граѓани кои имаат право на здрав и безбеден јавен простор“, истакна Алиу.
Тој посочи дека новото законско решение ја следи современата реалност, во која покрај традиционалните цигари се користат и електронски цигари, загреани тутунски производи и нови форми на никотински производи што бараат јасна и современа регулатива.
Според податоците што ги изнесе министерот, употребата на тутун е поврзана со над 3.600 смртни случаи годишно, а економските последици се проценуваат на повеќе од 600 милиони евра годишно. Дополнително, 13,6 отсто од младите на возраст од 13 до 15 години користат тутунски или никотински производи, 57 проценти од учениците се изложени на чад во затворени јавни простори, а 73 проценти од младите пушачи изјавиле дека без проблем купиле цигари и покрај возраста.
Со законот се предвидуваат појасни правила за пушење на терасите, поголема заштита во здравствените, образовните и детските установи, ограничувања за пушење во присуство на деца, како и целосна забрана за рекламирање и промоција на тутунски и никотински производи, вклучително и на интернет и социјалните мрежи.
„Здравјето нема цена и нема алтернатива“, порача Алиу.
Тој додаде дека зад подготовката на законското решение стоел обемен консултативен процес, во кој биле одржани седум состаноци со тутунската индустрија, пет со претставници на угостителскиот сектор, усогласувања со институциите и консултации со 14 инспекциски и надзорни органи, како и разгледување на 58 коментари доставени преку ЕНЕР од граѓани, трговци и експерти.
